बुद्ध एयरले जेठ २७ देखि विराटनगर–पोखरा उडान गर्ने

बुद्ध एयरले अर्काे सातादेखि विराटनगर–पोखरा उडान सुरु गर्ने भएको छ । पोखरा बेस बनाएर बुद्धले प्रदेश १ र गण्डकी प्रदेशमा अन्तरप्रादेशिक उडान जेठ २७ (जुन १०) गतेदेखि सुरु गर्ने भएको हो ।

बुद्ध एयर विराटनगरका स्टेसन म्यानेजर कौशल भण्डारीका अनुसार बुद्धको ७२ सिटे एटीआर जहाजले पोखरा–विराटनगर–पोखरा उडान गर्नेछ । विराटनगर–पोखराका लागि बुद्धले टिकट बिक्री खुला गरेको छ । विराटनगर–पोखराको भाडा छ हजार रुपियाँ तोकिएको छ ।

गण्डकी प्रदेश र प्रदेश १ को राजधानी विराटनगरबीच हुने यो उडानबाट पर्यटन व्यवसायी उत्साहित भएका छन् । पर्यटन व्यवसायी भवेश श्रेष्ठले आन्तरिकसँगै भारतको विहार, बङ्गाल र सिक्किमका पर्यटकलाई विराटनगर ट्रान्जिट बनाएर पोखरा उडान गराउन सक्ने अवसर सिर्जना भएको बताए । बुद्ध एयरले नेपाल नागरिक उड्डयन प्राधिकरणसँग उडान स्वीकृति लिइसकेको छ ।

यसैगरी बुद्ध एयरले विराटनगर–भैरहवासमेत उडान गर्ने योजना बनाएको भए पनि अहिले नै तालिका बनिसकेको छैन । यात्रुको माग भए भैरहवा उडान भर्ने योजना रहेको भण्डारीले जानकारी दिए । विराटनगर विमानस्थलका निमित्त प्रमुख युवल बरालले यसअघि उडान गरिसकेको बुद्धले सेड्युलमा पुनः उडानका लागि प्रक्रियामा रहेको बताए ।