बलेफी हाइड्रोपावरद्वारा वार्षिक साधारण सभा आह्वान

Laltin.com

भदौ २५, २०८० सोमबार

बलेफी हाइड्रोपावरद्वारा वार्षिक साधारण सभा आह्वान

बलेफी हाइड्रोपावर लिमिटेडले शतप्रतिशत हकप्रद शेयर निष्काशन गर्ने प्रस्ताव पारित गर्न साधारण सभा आह्वान गरेको छ ।

कम्पनीको भदौ २४ गते बसेको सञ्चालक समितिको निर्णयले साधारण सभा असोज १८ गते, आम्रपालि ब्याङ्क्वेट, नक्साल, काठमाडौँमा आह्वान गरेको हो । कम्पनीको दशौँ र एघारौँ वार्षिक साधारण सभा बिहान साढे ११ बजे शुरु हुनेछ ।

सभामा यस कम्पनीले १:१ अनुपातमा हकप्रद सेयर जारी गर्ने प्रस्ताव पेश गर्नेछ । हाल कम्पनीको चुक्ता पुँजी १ अर्ब ८२ करोड ७९ लाख ७० हजार रुपैयाँ रहेको छ । सोही पुँजीको १००% राइट सेयर जारी गर्ने प्रस्ताव अघि सारेको हो । यस कम्पनीले लाभांश सम्बन्धी कुनै प्रस्ताव गरेको छैन ।

साधारण सभा प्रयोजनार्थ कम्पनीले असोज ५ गते एक दिनका लागि बुकक्लोज गर्ने भएको छ । यस अनुसार असोज ४ गतेसम्म नेप्सेमा कारोबार भइ कायम शेयरधनीहरुले कम्पनीको साधारण सभामा सहभागिता जनाउन सक्नेछन् ।