महंगो र धेरै प्रतिफल दिने युनिलिभर नेपालको सेयर अब कता लाग्ला ?

नेपाल स्टक एक्सचेन्ज(नेप्से)को सबैभन्दा महँगो सेयर हो युनिलिभर नेपाल कम्पनी लिमिटेड। मूल्यमा बाँकी सबै इक्विटीलाई पछि पारेको युनिलिभरले लाभांश र प्रतिफल वितरणमा पनि सूचीकृत अधिकांशलाई सजिलै उछिन्ने गरेको छ।

सबैभन्दा मूल्यवान कम्पनी र आकर्षक प्रतिफलको उपाधि बोकेको ‘युनिलिभर नेपाल’ प्रत्येक साना-ठुला लगानीकर्ताले पोर्टफोलियोमा सजाउन चाहने स्टक हो। सबल व्यवस्थापन, उत्साहजनक वित्तीय प्रदर्शनी र लगानीको शत प्रतिशत सुनिश्चितता पनि कम्पनीका थप सकारात्मक पक्ष हुन्।

मूल्यवान भएकै कारण पनि कम्पनीको सेयर नेप्से परिसूचकको तुलनामा निकै कम ‘भोला टाइल'(परिवर्तनशील) छ। युनिलिभर नेपालको बेटा भ्यालु पनि १ भन्दा न्यून रहेको छ। युनिलिभर नेपालको स्टकलाई पोर्टफोलियोमा समावेश गर्दा यो स्टक बिनाको समान पोर्टफोलियोको तुलनामा कम जोखिमपूर्ण हुने गर्छ।

जोखिमका दृष्टिकोणबाट सक्षम देखिए तापनि कम्पनीको सक्रियात्मक प्रस्तुति भने बजार औसत भन्दा कम हुने गर्छ।
धितोपत्र बजारकै सर्वाधिक महँगो सेयर हुँदा ‘युनिलिभर नेपाल’ को कारोबार पनि उत्साहजनक व्यवहारले नहुने गरेको पाइन्छ। एक साताको औसत कारोबार सङ्ख्या हेर्ने हो भने मुस्किलले कम्पनीको २ देखि ३ वटा कारोबार हुने गरेका छन्। एक वर्षको अन्तरालमा पनि कम्पनी औसतमा ५ देखि ६ वटा कारोबार हुने गरेका छन्।

यस्तै कारोबार मात्रा पनि निकै न्यून छ। पछिल्लो एक वर्षको औसत कारोबार मात्रा जम्मा ७१ कित्ता रहेको छ। सूचीकृत अन्य कम्पनीको तुलनामा निकै न्यून कारोबार सङ्ख्या र कम कित्ता खरिद बिक्री हुने हुँदा पनि कम्पनीको मूल्यमा अप्रत्याशित उतारचढाव देखिँदैन।
यो साता कम्पनीको सेयरमा विशेष तेजी देखिएको छ। ५२ हप्ताको न्यूनतम मूल्यबाट बढेको कम्पनीको मूल्य सातामा ४ प्रतिशत अधिक बढेको छ। ५२ हप्ताको न्यूनतम मूल्य विन्दु नजिक भएकै कारण पनि खरिदकर्ताको तीव्र चाप कम्पनीको सेयरमा यस साता देखियो।

पछिल्लो गतिविधि

गत कात्तिक ११ मा भिडियो कन्फ्रेन्सका माध्यमबाट २८ औँ वार्षिक साधारणसभा सम्पन्न गरेको युनिलिभर नेपालले गत आर्थिक वर्षको मुनाफाबाट कायम चुक्ता पुँजीको ६५० प्रतिशतले हुन आउने नगद लाभांश पारित गरेको छ।

सभाले सञ्चालक समितिले सिफारिस गरे बमोजिम युनिलिभर नेपालले प्रतिसेयर ६५० रुपैयाँका दरले नगद लाभांश वितरण गर्ने प्रस्ताव पारित गरेको हो।

साधारणसभा प्रयोजनार्थ कम्पनीले असोज २५ देखि कात्तिक ११ सम्म बुकक्लोज गरेको थियो। जसअनुसार असोज २४ सम्म नेप्सेमा कारोबार भइ कायम सेयरधनीहरूले कम्पनीको साधारणसभामा सहभागिता जनाउन पाएका थिए भने प्रस्तावित लाभांश पनि प्राप्त गर्न योग्य भएका थिए।

नाफामा वृद्धि

गत आर्थिक वर्षको दोस्रो त्रैमासको तुलनामा युनिलिभर नेपालको नाफा १३६.८१ प्रतिशत वृद्धि भएको छ। चालु आर्थिक वर्षको दोस्रो त्रैमासको तथ्यांकअनुसार पुस मसान्तसम्म आइपुग्दा कम्पनीले ३१ करोड १४ लाख रुपैयाँ खुद नाफा कमाएको छ। गत आर्थिक वर्षको सोही अवधिमा युनिलिभरको यस्तो नाफा १३ करोड १५ लाख रुपैयाँमा सीमित थियो।

व्यावसायिक आम्दानी र अन्य स्रोतबाट हुने आय बढ्दा कम्पनीको खुद नाफामा सकारात्मक प्रभाव परेको देखिन्छ।

चालु आर्थिक वर्षको दोस्रो त्रैमाससम्म आइपुग्दा कम्पनीको व्यापार विस्तारबाट हुने आम्दानी ४२.०३ प्रतिशत वृद्धि भएको तथ्यांकले देखेको छ। गत आर्थिक वर्षको सोही अवधिमा एक अर्ब १७ करोड ६२ लाख रुपैयाँ रहेको युनिलिभरको व्यावसायिक आम्दानी चालु आर्थिक वर्षको दोस्रो त्रैमासमा सन्तोषजनक रूपले बढ्दै एक अर्ब ६७ करोड ५ लाख रुपैयाँ पुगेको छ। समीक्षा अवधिमा आम्दानी ४९ करोड ४३ लाख रुपैयाँ बढेको हो।

यस्तै, कम्पनीको अन्य स्रोतको मध्यमबाट हुने आय पनि ८८.४४ प्रतिशत बढेर ३ करोड ३६ लाख रुपैयाँ कायम हुन पुगेको छ। गत आर्थिक वर्षको दोस्रो त्रैमाससम्म यस्तो आय एक करोड ७३ लाख रुपैयाँमा सीमित थियो।

चालु आर्थिक वर्षको दोस्रो त्रैमाससम्म युनिलिभरको चुक्ता पुँजी ९ करोड २१ लाख रुपैयाँ छ भने सञ्चित मुनाफा २ अर्ब ५१ करोड २३ लाख रुपैयाँ छ। गत आर्थिक वर्षको यसै अवधिको तुलनामा चुक्ता पुँजीको आकार स्थिर रहँदा कम्पनीको सञ्चित मुनाफा भने २३.१२ प्रतिशत बढेको छ।

खुद नाफामा उल्लेखनीय वृद्धि देखिएको युनिलिभर नेपालको प्रतिसेयर आम्दानी पनि सोही अनुरूप उत्साहजनक तवरले बढेको छ। गत आर्थिक वर्षको दोस्रो त्रैमासमा १४३ रुपैयाँ रहेको कम्पनीको प्रतिसेयर आम्दानी चालु आर्थिक वर्षको सोही अवधिमा ३३८ रुपैयाँ पुगेको छ।
समीक्षा अवधिमा कम्पनीको प्रतिसेयर नेटवर्थ पनि बढेर २ हजार ७९२ रुपैयाँ कायम छ। गत आर्थिक वर्षको पुस अन्त्यसम्म कम्पनीको प्रतिसेयर नेटवर्थ २ हजार ३१६ रुपैयाँ थियो।

दोस्रो बजारमा कम्पनीको अन्तिम कारोबार मूल्य १९ हजार १७३.९० रुपैयाँका आधारमा मूल्य आम्दानी अनुपात ५६.७३ गुणा छ।

प्राविधिक अवस्था

५२ हप्ताको न्यूनतम मूल्य नजिक किनबेच हुँदै गरेको युनिलिभर नेपालको अन्तिम कारोबार मूल्य १९ हजार ११३ रुपैयाँ छ। कम्पनीको ५२ हप्ताको न्यूनतम मूल्य १८ हजार ५० रुपैयाँ हो।

कुनै समय ३६ हजार रुपैयाँसम्मको उच्चतम मूल्यमा खरिदबिक्री भएको युनिलिभर नेपालको सेयर त्यसपछि लामो समयसम्म २३ हजार रुपैयाँ भन्दा कम मूल्यमा नै कारोबार भएको देखिन्छ। कोभिडसँगै आएको सेयर बजारको उछालका बाबजुद लघुवित्तको सेयर मूल्य २३ हजार रुपैयाँभन्दा माथि जान सकेन।

समायोजित प्राविधिक चार्ट अनुसार कम्पनी तत्काल रेञ्जिङ ट्रेन्डमा रहेको अनुमान लगाउन सकिन्छ। यस्तो ट्रेन्डमा मूल्य अपर रेन्जको अवरोध विन्दु र बटम रेन्जको टेवा विन्दुभित्र नै उतारचढाव हुने गर्छ। यस प्रकारको ट्रेन्डलाई सरल भाषामा साइडवेज मार्केट पनि भन्ने गरिन्छ।

कम्पनीको मूल्य २३ हजार रुपैयाँको अपर रेन्ज र १८ हजार रुपैयाँको बटम रेन्जबीच घटबढ हुने गरेको छ।
३६ हजार रुपैयाँको उच्चतम अवरोध विन्दुपछि तीव्र रूपले घटेको युनिलिभर नेपालको सेयर मूल्यले १८ हजार रुपैयाँको सपोर्टमा आएर थामिएको थियो।

यस विन्दुमा कम्पनीको माग पुनः सिर्जना भएको कम्पनीको सेयर गतिविधिले देखाएको छ। बढ्दो मागका कारण कम्पनीको मूल्य टेवा क्षेत्रदेखि भने वृद्धि भएको देखिन्छ।

बढ्दो मूल्य सर्वप्रथम २० हजार ५०० रुपैयाँको मूल्यलाई परीक्षण गर्ने गरेको छ। धेरै पटकको उतार चढावमा मूल्यले यस विन्दुलाई अवरोधको रूपमा हेर्ने गरेको पाइन्छ। यस विन्दुको सफल ब्रेक आउटपछि मात्र मूल्यले २३ हजार रुपैयाँको लक्ष्य लिएर अघि बढ्ने गरेको छ।

अहिले पनि मूल्यले सोही प्रवृत्ति दोहोर्‍याएको छ। कम्पनीको माग १८ हजार रुपैयाँको टेवा मूल्य विन्दुबाट नै सृजना भएको छ। मूल्यले यो पटक पनि पहिला २० हजार ५०० रुपैयाँको अवरोध विन्दुलाई नै परीक्षण गर्ने अनुमान लगाउन सकिन्छ।

यद्यपि सो विन्दु मूल्यका लागि कतिको विशाल बाधा हुनेछ भने हेर बाँकी नै छ। यस विन्दुलाई पार गर्न असफल ठहरिदा मूल्यलाई पुनः १८ हजार रुपैयाँको टेवाको सहायता आवश्यक पर्नेछ।

तर २० हजार ५०० रुपैयाँको खुड्किलो पार गरेको अवस्थामा भने मूल्यले अपर रेन्जको २३००० रुपैयाँ मूल्य विन्दुको सामना गर्ने देखिन्छ। यस क्षेत्रमा पुँजीगत लाभ खोज्ने लगानीकर्ता तथा ट्रेडरहरु निकै सक्रिय हुने देखिन्छ।

नाफा बुकिङका करण सृजना हुने अत्यधिक आपूर्ति बढ्दो मागले समर्थन नगरेको अवस्थामा भने मूल्यले पुनः पनि ओरालो यात्रा तय गर्ने निश्चित छ।

क्यान्डल स्टिक विश्लेषणका आधारमा

साताको अन्तिम कारोबार दिन युनिलिभर नेपालको सेयर गतिविधिले खरिदकर्ताको तीव्र चापसहितको बुलिस मरुबोजु क्यान्डल स्टिक रचना गरेको छ। दुई कारोबार दिनदेखि नै लगातार ग्याप आफ ओपनिङका साथ निर्माण भएको उक्त क्यान्डल स्टिक आकृतिले कम्पनीको सेयरले मूल्य आगामी दिनमा पनि बढ्ने स्पष्ट संकेत दिएको छ।

यद्यपि २० हजार ५०० रुपैयाँको अवरोध मूल्य विन्दु नजिकिँदा मूल्यमा अप्रत्याशित गिरावट देखिने सम्भावना पनि अब्बल छ। उक्त मूल्य रेखामा लगानीकर्ताले पुँजीगत लाभ सुरक्षण गर्न सक्दो सेयर बेच्ने अनुमान गर्न सकिन्छ।

यस्तो अवस्थामा माग भन्दा असमानुपातिक आपूर्ति सिर्जना हुँदा मूल्यले नकारात्मक गति समात्ने गर्दछ। यद्यपि सो अवरोध विन्दु माथि कम्पनीको मूल्य स्थिर रहेको अवस्थामा भने सेयरले २२ हजार देखि २२ हजार ५०० रुपैयाँको लक्ष्य लिएर अघि बढ्ने देखिन्छ।

१८ हजार रुपैयाँको ‘मेजर सपोर्ट’ बाट बाउन्स ब्याक लिएको युनिलिभर नेपालको सेयरले केही समय सकारात्मक प्रतिक्रिया भने अवश्य पनि दिने देखिन्छ। निश्चित टार्गेट र स्टप लसको रणनीतिले लगानीकर्ता यस कम्पनीको सेयरबाट लाभान्वित हुने अब्बल सम्भावना छ।

स्रोत: bizmandu

नोट : सेयर बजारको प्राविधिक विश्लेषण विभिन्न औजारमा आधारित अनुमान हो। लगानीकर्ताले लगानी गर्दा आफ्नो जोखिम लिन सक्ने क्षमता र कम्पनीको वित्तीय अवस्था हेरेर लगानी गर्नुपर्छ। यो लेख कारोबारको सिफारिस गर्न भने होइन। कारोबार गर्दा आफ्नो स्वविवेक प्रयोग गर्दा उत्तम हुन्छ ।