श्रीलंकाका राष्ट्रपति दिसानायकेले जनवरीमा चीन भ्रमण गर्ने

श्रीलंकाका राष्ट्रपति अनुरा कुमारा दिसानायकेले दुई पक्षीय सम्बन्ध विस्तारका लागि आगामी जनवरीमा चीनको भ्रमण गर्ने भएका छन् ।

कोलम्बोमा खाद्यान्न, इन्धन र औषधिजस्ता अत्यावश्यक आयातका लागि विदेशी मुद्रा समाप्त भएको सन् २०२२ को आर्थिक मन्दीको समयमा श्रीलंकाको द्विपक्षीय ऋणको आधाभन्दा बढी हिस्सा चीनले ओगटेको थियो ।

अन्तर्राष्ट्रिय मुद्रा कोषको उद्धार प्याकेज प्राप्त गरेपछि र सरकारको बिग्रिएको वित्तीय अवस्थालाई सुधार गर्ने उद्देश्यले मितव्ययिता सुधार लागू गरेपछि यहाँको अर्थतन्त्रमा बिस्तारै सुधारको संकेत आउन थालेका छन् ।

वामपन्थी नेता दिसानायके भ्रष्टाचारविरुद्ध लड्ने प्रतिबद्धताका साथ गत सेप्टेम्बरमा सत्तामा आएका थिए । मध्यावधि संसदीय चुनावमा आफ्नो पार्टीले भारी मतान्तरले विजय हासिल गरेपछि उनले नागरिकसामु निर्वाचनका समय गरेका आफ्ना प्रतिवद्धता पुरा गर्न छिमेकी मुलुकहरूको भ्रमण गर्दै कुटनीतिक सम्बन्धलाई थप कसिलो बनाउने अभियान शुरू गरेका छन् । उनले यसै महिना भारतको भ्रमण गरिसकेका छन् ।

“म अर्को महिनाको मध्यतिर चीन जाँदैछु,” उनले पत्रकारसँग भने ।

राष्ट्रप्रमुखको रूपमा दिसानायकेको पहिलो विदेश भ्रमण छिमेकी देश भारतमा भएको थियो । उनलाई डिसेम्बर १६ मा भारतीय राष्ट्रपति द्रोपदी मुर्मू र प्रधानमन्त्री नरेन्द्र मोदीले स्वागत गरेका थिए ।

क्षेत्रीय पावरहाउस भारत हिन्द महासागर क्षेत्रमा प्रभाव जमाउन चीनसँग कडा प्रतिस्पर्धा गरिरहेको छ ।

एजेन्सी