बस्ती डुबानमा परेपछि कैलालीका १० जनालाई सुरक्षित ठाउँमा सारियो

वर्षाका कारण कटैनी नदीमा पानीको बहाव बढेपछि कैलालीको कैलारी गाउँपालिका–५ पुरानो मनिकापुर बस्ती डुबानमा परेको छ । बस्तीका एक सय २६ जनामध्ये १९ घरधुरीका एक सय १६ जना आफ्नै घरको माथिल्लो तलामा तथा आफन्तको घरमा सुरक्षित साथ बसेका र पाँच परिवारका १० जनालाई सुरक्षित ठाउँमा सारिएको प्रहरीले जनाएको छ ।

यस्तै कञ्चनपुरको शुक्लाफाँटा नगरपालिका–१० झलारीको नहर टोलका दुई दर्जनभन्दा बढी स्थानीय बासिन्दाको घरभित्र वर्षातको पानी पसेको छ । पानीको निकास साँघुरो हुँदा वर्षाको पानी स्थानीय बासिन्दाको घरभित्र पसेको हो । वर्षाको पानी घरभित्र पस्दा स्थानीय बासिन्दाका लत्ताकपडा, खाद्यान्न, भाडाँकुडालगायत अन्य अत्यावश्यक सामग्रीमा क्षति पुगेको छ ।

इलाका प्रहरी कार्यालय झलारीका प्रहरी जवान, डिभिजन सडक कार्यालय, सिँचाइ आयोजनाका कर्मचारी र स्थानीय बासिन्दाले थुनिएको कल्भर्ट सफाइको काम गरेका प्रहरीले जनाएको छ ।

एजेन्सी