चितवन मिल्क उद्योगको गोदाममा ७५ करोड रुपैयाँको दूध र घिउ थन्कियो

चितवनको भरतपुर महानगरपालिका–१ ठिमुराको चितवन मिल्क उद्योगमा ७५ करोड रुपैयाँ बराबरको दूध र घिउ थन्किएको छ ।

उद्योगका प्रबन्धक दुर्गा पराजुलीले दूध ल्याएका संस्थाले प्रशोधित दुग्धजन्य पदार्थ बिक्री नभएर लैजान छाडेपछि भण्डारमा थन्किएको जानकारी दिए । पाँच सय टन नौनी घिउ भण्डारमा रहेको भन्दै उनले उद्योगमा तीन सय र ५०/५० टनका तीन वटा चिस्यान केन्द्र तथा तिनका चार वटा प्यासेज घिउले भरिएका बताए ।

प्रशोधन गरिएको नौनी घिउ र धुलो दूध बिक्री नभएर भण्डारण गर्ने ठाउँ नभएपछि उद्योग माघ २२ गतेदेखि बन्द भएको हो । उद्योग बन्द भए पनि मासिक झन्डै १६ लाख रुपैयाँको बिजुली र १० लाख रुपैयाँ हाराहारीको डिजेल खर्च हुने गरेको उनले जानकारी दिए ।

पराजुलीका अनुसार प्रशोधित दूध बिक्री नहुँदा किसानले भुक्तानी पाएका छैनन् भने उद्योगले प्रशोधन शुल्क पाउन सकेको छैन । डेरी उद्योग र सहकारीलाई सामान लैजान ताकेता गरिरहेको भए पनि नलगेपछि उद्योग सञ्चालन गर्नै नसकेर बन्द गरिएको उनले बताए ।

अहिले मिल्क उद्योगमा ३१ वटा डेरी, निजी फर्म र सहकारीको दूध भण्डार भएर बसेको छ । उत्पादित सामग्री बिक्री हुन नसकेपछि उद्योग आर्थिकरूपमा समेत समस्यामा परेको छ । प्रशोधनसमेत रोकिएपछि 'मिल्क होलिडे' को सम्भावना बढेर गएको भन्दै किसान चिन्तित छन् ।