अण्डर १९ विश्वकपमा नेपाल अफगानिस्तानसँग खेल्दै

आईसीसी अण्डर १९ विश्व कप अन्तर्गत समूह चरणको आफ्नो अन्तिम खेलमा नेपाल आज अफगानिस्तानविरुद्ध खेल्दै छ । दक्षिण अफ्रिकामा जारी खेल नेपाली समय अनुसार दिउँसो पौने २ बजे हुने छ ।

जितको दबाबसहित मैदान उत्रन लागेको नेपाल सुपर सिक्समा पुग्न जित्नै पर्ने छ । यसअघिका दुवै खेलमा पराजित भएकाले सुपर सिक्समा प्रवेश गर्न नेपाललाई जितका लागि दबाब बढेको हो ।

यसअघि पहिलो खेलमा न्युजिल्यान्डसँग नेपाल ६४ रनले पराजित भएको थियो भने दोस्रो खेलमा पाकिस्तानसँग ५ विकेटले हारेको थियो आज अफगानिस्तानविरुद्ध जित निकाले नेपालले पुनः न्युजिल्यान्ड र पाकिस्तानसँग खेल्न पाउनेछ । आजको खेलमा जित निकाले नेपाल सुपर सिक्सको समूह–१ मा पुग्नेछ ।

यता, सुपर सिक्स प्रवेशकालागि अफगानिस्तान पनि जितको दबाबमा छ । यसअघि पहिलो खेलमा पाकिस्तानसँग १८१ रनले अफगानिस्तान पराजित भएको थियो भने दोस्रो खेलमा न्युजिल्यान्डसँग एक विकेटको हार व्योहरेको थियो ।