एमाले बागमती अधिवेशन : मतदान भोलि बिहान ८ बजे देखि

नेकपा एमालेको काठमाडौंमा जारी बागमती प्रदेश अधिवेशनको निर्वाचन कार्यतालिका फेरि फेरिएको छ। नयाँ कार्यतालिका अनुसार भोलि बिहान ८ बजेदेखि मतदान हुनेछ ।

निर्वाचन मण्डलका सदस्य शेरबहादुर तामाङका अनुसार आज राति ८ बजेसम्म उम्मेदवारी फिर्ता लिने समय तोकिएको छ भने ९ बजे उम्मेदवारको अन्तिम नामावली प्रकाशन हुनेछ । त्यतिबेलासम्म सहमतिको प्रयास जारी रहने उनको भनाइ छ ।

निर्वाचन कार्यतालिका यसअघि दुईपटक परिवर्तन भइसकेको छ । आज बिहान ११ बजे हुने भनिएको मतदान साँझ ६ बजेसम्मका लागि सारिएको थियो ।

अध्यक्षमा उम्मेदवारी दिएका नुवाकोटका केशव पाण्डेले भने उम्मेदवारी फिर्ता लिएका छन् ।

पाण्डेले उम्मेदवारी फिर्ता लिएसँगै अब अध्यक्षका लागि चारजना मैदानमा छन् । अब कृष्ण दाहाल, केशवबहादुर बुढाथोकी, कैशालप्रसाद ढुंगेल र सानुकुमार श्रेष्ठ अध्यक्षका उम्मेदवार बनेका छन्।

पाण्डेले अर्का प्रत्यासी कैलाश ढुंगेललाई समर्थन गर्ने पनि घोषणा गरेका छन् ।