ब्रोकर अफिस बन्द गराउन दर्जनौं दलालको दौड, ब्रोकर कार्यालयहरूमा तालाबन्दी सुरू!

आगामी आर्थिक वर्षका निम्ति घोषित बजेटको नयाँ व्यवस्थाले पुँजीबजार र घरजग्गा कारोबारमा असर परेको भन्दै सेयर र घरजग्गा लगानीकर्ताहरुले विरोध कार्यक्रम आयोजना गरेका छन् । तिलक कोइरालाको नेतृत्वमा एउटा टोली आज बिहान महाराजगञ्जस्थित अर्थमन्त्री डा. प्रकाशशरण महतको निवास घेर्न पुगेकोमा सुरक्षाकर्मीको अवरोधपछि फर्केको छ ।

सुरक्षाकर्मीले रोकेपछि झण्डै पाँच दर्जनको संख्यामा रहेका सेयर दलाल र लगानीकर्ताहरुले बाँसबारीस्थित राष्ट्रिय हृदयरोग केन्द्र बाहिर कोणसभा गरेका छन् । बिहान साढे ७ बजे आयोजित कार्यक्रममा उनीहरुले अहिले १० बजेपछि सबै सेयर ब्रोकर कार्यालय पुगेर पोष्टर टाँस्ने,तालाबन्दी गर्ने र दिउँसो ३ बजेपछि माइतीघरमा चियापानसहित विरोध कार्यक्रम गर्ने जानकारी दिएका छन् । 

उता काठमाडौं उपत्यका बाहिरका ब्रोकर कार्यालयमा सम्बन्धित जिल्लाका सेयर लगानीकर्ताले तालबन्दी गर्ने योजना छ । उपत्यकाको हकमा क्षेत्रगत रुपमा तालाबन्दी गर्न मोबाइल नम्बरसहित व्यक्ति खटाइएको छ । 

जसअनुसार अनामनगर क्षेत्रमा केशव कोइराला,हनुमानस्थान क्षेत्रमा विहाल कडरिया, पुतलीसडक क्षेत्रको निम्ति नयन बास्तोला,न्युप्लाजा क्षेत्रमा एलबी साह,कमलादीमा रोहन कार्की र सुनिल शिवाकोटी तोकिएका छन् । त्यसैगरी कमलपोखरी क्षेत्रमा तिलक कोइराला,नयाँ बानेश्वर क्षेत्रमा नानीबाबु खरेल र नवराज उप्रेती, न्युरोड क्षेत्रमा कुमार सिटौला, सुन्धारा क्षेत्रमा सुजन उप्रेती, गौशाला वरपर सन्तोष उप्रेती, सार्थक रायमाझी र माधवप्रसाद ओलीलाई खटाइएको छ ।

प्राप्त विवरणअनुसार ब्रोकर कार्यालय बन्द गराउन कालिमाटी क्षेत्रमा चन्द्रगोपाल,विनोद रिसाललाई तोकिएको छ । राजदरबार उत्तरढोका क्षेत्रमा निराजन चिलुवाल,जावलाखेलमा मेनुका ढकाल र समुन्द्रमान श्रेष्ठ खटिइसकेका छन् ।

यसअघि डा. प्रकाशशरण महत अर्थमन्त्रीमा नियुक्त हुँदा सेयर लगानीकर्ता,घरजग्गा लगानीकर्ता र दलालहरुले नै समर्थनमा सामाजिक सञ्जाल रंगाएका थिए । उनीहरुले मुलुकको अर्थतन्त्र र पुँजी बजार सबै अप्ठेरोमा पुग्नुको कारण नेपाल राष्ट्र बैंक र त्यहाँका गभर्नरलाई दोष लगाउँदै महत अर्थमन्त्रीले कायापलट गर्ने धारणा राखेका थिए । मन्त्रीलाई बधाई दिन फूलका निकै ठूला बुके बोकेर अहिले विरोधमा उत्रेकाहरु नै केही महिनाअघि सिंहदरबार छिरेका थिए ।