बालबालिकाको दाँतको हेरचाह

नेपालमा बालबालिकाहरूका स्थायी दाँत आउने उमेर थाहा नहुँदा धेरैजसो बच्चा दाँतको समस्याबाट पीडित भइरहेका छन् । 

साधारणतया पहिलो स्थायी दाँत ६ वर्षदेखि उम्रन सुरु हुन्छ । सर्वप्रथम तल्लो अगाडिका स्थायी दाँतहरू उम्रन्छन् ।  त्यसपछि चारवटा बंगाराका (माथि दुई र तल दुई) स्थायी दाँत उम्रन्छन् । यी बंगाराका दाँतहरू कम उमेरमै उम्रने हुँदा धेरै अभिभावकले दुधे दाँत नै उम्रेको ठान्छन् ।

झरिहाल्ने दाँत भनेर प्राय अभिवावकहरुले उचित हेरचाह गर्दैनन् । त्यसकारण धेरैजसो बंगाराहरू छिट्टै कीराले खाने र कतिपयको उपचार नै गर्न नमिल्ने अवस्थामा पनि हुनसक्छ। यी सबै समस्याको समाधानका लागि सानै उमेरदेखि डेन्टल भिजिट जरुरी हुन्छ । 

यी चारवटा बंगाराले खाना चपाउनमा महत्वपूर्ण भूमिका निर्वाह गरेका हुन्छन् । राम्ररी चपाएर खाएमा पाचन क्रियामा समस्या आउँदैन र शरीर स्वस्थ रहन्छ । त्यसैले बालबालिकाहरूका यी दाँत स्वस्थ छन् कि छैनन् हेर्न जरुरी छ । साधारण कीराले खाएको छ भने तत्कालै डेन्टल क्लिनिक वा अस्पतालमा गएर भराउनु (फिलिङ) पर्छ ।दुखेको अवस्था छ भने पनि सकेसम्म जरादेखि भर्दा राम्रो हुन्छ । जरादेखि भरेर कृत्रिम खोल हालेमा बलियो हुन्छ र भविष्यमा यसमा समस्या आउँदैन ।

हामीले सानै उमेरदेखि स्वस्थ खाना खुवाउने, दूध र दूधजन्य पदार्थहरू बढी खुवाउने गर्दा स्थायी दाँतहरू बलिया हुन्छन् र छिटो कीराले खाँदैन। खाना अड्किएको खण्डमा डेन्टल फ्लस गर्न लगाउने र सही तरिकाले २,३ मिनेट दिनहुँ दुईपटक फ्लोराइडयुक्त दन्त मञ्जनले ब्रस गर्ने बानी बसाल्नुपर्छ । यसले दाँत कीराले खाई दुख्ने समस्याबाट सधैका लागि मुक्त हुन सकिन्छ ।

यसरी समयमा उचित उपचार भएमा भविष्यमा आउने ठूलो समस्याबाट बच्न सकिन्छ ।