अमेरिकाले सैन्य बलले ग्रिनल्याण्ड लिन नसक्ने यूरोपेली आयोगकी प्रवक्ताको दाबी

अमेरिकी राष्ट्रपतिमा चयन भएका डोनाल्ड ट्रम्पले आफ्नो स्वामित्वमा भएको सामाजिक सञ्जाल ट्रूथ सोसलमा डेनमार्कको स्वायत्त भूमि ग्रिनल्याण्डलाई किन्ने वा कब्जा गर्ने बताइरहेको बेला त्यो सम्भव नभएको यूरोपेली अधिकारीले बताएका छन् ।

यूरोपेली आयोगकी प्रवक्ता पाओला पिन्हाले ट्रम्पको धारणालाई अनुमानमात्रै भनेकी छिन् । मंगलबारको पत्रकार सम्मेलनमा पनि ट्रम्पले अमेरिकाको राष्ट्रिय सुरक्षाको लागि ग्रिनल्याण्ड महत्वपूर्ण भएको भन्दै सैन्य बल प्रयोगको कुरा अस्वीकार गरेका थिएनन् । अझ रोचक ट्रम्पले ग्रिनल्याण्ड किन्ने वा कब्जा गर्ने भनेको केही समयमा उनका छोरा ग्रिनल्याण्ड भ्रमणमा निस्किएका छन् ।

डोनाल्ड ट्रम्प जुनियर बुधबार ग्रिनल्याण्ड पुगेका हुन् । तर, यो भ्रमण औपचारिक नभएर निजी भएकोले ग्रिनल्याण्डका अधिकारीहरूले नभेट्ने बताइएको छ । ग्रिनल्याण्डमा अमेरिकी सैन्य शिविर पनि रहेको छ । उत्तर अमेरिकी महादेशमा पर्ने ग्रिनल्याण्ड विश्वको सबैभन्दा ठूलो टापु हो । यहाँको ८० प्रतिसत भू-भाग हिँउले ढाकेको छ । यूरोपेली संघको सदस्य देश डेनमार्कको स्वायत्त देशको रूपमा रही आएको छ ।

एजेन्सी