दिनमै ४/५ कप कफी पिउनुहुन्छ भने हुनुहोस् सावधान

कफी, जो हर कोही मानिसलाई मनपर्छ । साथीभाइ भेट्दा वा घरमा पाहुना आउँदा कफी दिने चलन पनि हुन्छ । किनकि यो बनाउन छिट्टो र स्वादमा पनि मिठो ।

कार्यालयमा खाली समय भयो भने कफी पिउन जाने । रातमा निद्रा भगाउन पनि कफी नै । पायो भने हामी दिनमै ५/६ कप कफी पनि पिउँछौँ । थोरै मात्रामा कफी पिउनु कुनै चिन्ताको कुरा होइन तर, यदि तपाईं दिनभरमा दुई वा तीन कपभन्दा बढी कफी पिउनुहुन्छ भने यो खतरनाक साबित हुन सक्छ ।

आज हामी धेरै कफी पिउनुका नोक्सानहरूको बारेमा जान्नेछौँ । आउनुहोस्, धेरै कफी पिउनु कसरी तपाईंको स्वास्थ्यलाई नोक्सान पुर्‍याउन सक्छ भन्ने कुरा जानौँ-

निद्रा नआउनु

आफूलाई फ्रेस राख्न र निद्रा भगाउन मानिसहरू कफी पिउँछन् । तर, यदि तपाईंले धेरै मात्रामा कफी पिउनुभयो भने, यसले तपाईंको रातको निद्रा पनि उडाउन सक्छ । कफीको असर शरीरमा ७–८ घण्टासम्म रहन्छ । त्यसैले धेरै कफी पिउनाले रातमा आरामदायी निद्रा लिन गाह्रो हुन सक्छ ।

धड्कन तेज हुनु

कफीले शरीरको प्यारासिम्पेथेटिक प्रणालीलाई डिस्टर्ब गर्छ । यसले गर्दा शरीरमा क्याफिनको मात्रा धेरै हुँदा शरीरले आराम गर्न सक्दैन र एड्रेनालिन स्तर बढ्न थाल्छ । यसले गर्दा मुटुको धड्कन तेज हुन सक्छ । यसलाई एट्रियल फिब्रिलेशन भनिन्छ ।

यसका कारण मुटुसँग सम्बन्धित समस्याहरू सुरु हुन सक्छन् । त्यसैले तपाईं कति कफी पिउँदै हुनुहुन्छ भन्ने कुरामा ध्यान दिनुहोस् ।

रक्तचाप बढ्नु

कफीले शरीरमा एड्रेनालिनको स्तर बढाउँछ । एड्रेनालिन एक प्रकारको हर्मोन हो, जुन शरीरमा प्राकृतिक रूपमा पाइन्छ तर, यसको मात्रा धेरै हुँदा धमनीहरू सङ्कुचित हुन थाल्छन् । यसले गर्दा रक्तचाप बढ्छ । यसका कारण रक्तको थक्का बन्ने वा धमनीहरू फुट्ने खतरा पनि रहन्छ ।

खराब पाचन

कफीले मल त्याग्न मद्दत गर्छ तर, यसको मात्रा धेरै हुँदा यसले तपाईंको पाचनलाई नोक्सान पुर्‍याउन सक्छ । यसका कारण डायरिया, एसिड रिफ्लक्स र हर्ट बर्नको समस्या हुन सक्छ । त्यसैले धेरै क्याफिन पिउनु तपाईंको पाचनलाई बिगार्न सक्छ।

एजेन्सी