त्रिशुलीमा बस दुर्घटनाः ८ जनाको मृत्यु, ८ जना घाइते

काठमाडौंबाट पोखरा जाँदै गरेको बस गजुरी गाउँपालिकास्थित छहराबाट त्रिशुलीमा खस्दा ८ जनाको मृत्यु भएको छ । बाँकीको खोजी कार्य जारी रहेकाे प्रहरीले जनाएको छ । 

काठमाडौंबाट पोखरा जाँदै गरेको प्रदेश ३–०१–००५ ख ९९५२ नम्बरको बस आज बिहान सवा ११ बजे सडकबाट करिब ४० मिटर तल त्रिशूली नदीमा खसेको थियो । दुर्घटनामा २ महिला र ६ पुरुष गरी ८ जनाको मृत्यु भएको जिल्ला प्रहरी कार्यालय धादिङका प्रवक्ता एवम् डिएसपी सन्तु जयसवालले जानकारी दिए ।

‘घटनास्थलबाट १६ जनाको उद्धार गरिएको थियो, तिनीहरुमध्ये ८ जनाको डेथ भएको छ र ८ जना घाइतेको स्थानीय अस्पतालमा उपचार भइरहेको छ,’ डिएसपी जयसवालले भने ।

नेपाल प्रहरी र नेपाली सेनाले स्थानीयको सहयोगमा अहिले घाइतेको उद्धार गरिरहेका छन् । एम्बुलेन्समार्फत घाइतेलाई गजुरी स्वास्थ्य केन्द्र, गजुरी अस्पताल, मलेखु टिचिङ हस्पिटललगायत उस्वास्थ्य संस्थाहरुमा उपचारका लागि लगिएको  गजुरी गाउँपालिकाकी उपाध्यक्ष शर्मिला विसुरालले बताइन् ।