क्रोएसियाको विद्यालयमा भएको चक्कु आक्रमणमा ७ वर्षीया बालिकाको मृत्यु, ६ जना घाइते

क्रोएसियाको राजधानी जाग्रेबस्थित एक विद्यालयमा शुक्रबार भएको चक्कु आक्रमणमा सात वर्षीया बालिकाको मृत्यु भएको र एक शिक्षक तथा अन्य पाँच विद्यार्थी घाइते भएको प्रहरीले जनाएको छ । 

उनीहरूले आक्रमणकारीलाई ‘युवा पुरुष’ भनी वर्णन गरे र उनलाई पक्राउ गरिएको बताए । स्वास्थ्यमन्त्री इरेना ह्रिस्टिकले आक्रमणकारी १८ वर्षभन्दा माथिको भएको बताए । यद्यपि मिडियाले उनी १९ वर्षका भएको बताएको छ ।

क्रोएसियाली मिडियाले प्रकाशित गरेको भिडियो फुटेजमा बालबालिकाहरू स्कुलको भवनबाट भागेको र मेडिकल हेलिकप्टर स्कुलको आँगनमा अवतरण गरेको देखाइएको छ ।

प्रधानमन्त्री आन्द्रेज प्लेन्कोभिकले सरकारी बैठकको सुरुआतमा आक्रमणबाट ‘स्तब्ध’ भएको बताउँदै अधिकारीहरूले अझै के भयो भनेर पत्ता लगाउन काम गरिरहेको जानकारी दिए । उनले धेरै बालबालिकालाई जाग्रेबको विभिन्न अस्पतालमा लगिएको बताए ।

राज्यको एचआरटी टेलिभिजनले आक्रमणकारी स्कुलमा प्रवेश गरेको र आफूले फेला पारेको पहिलो कक्षाकोठामा गएर बालबालिकामाथि आक्रमण गरेको बताएको छ ।

क्रोएसियामा विद्यालय आक्रमणहरू दुर्लभ छन् । गत मे महिनामा छिमेकी सर्बियामा एक किशोरले राजधानी बेलग्रेडको एक विद्यालयमा गोली चलाउँदा नौ सहपाठी र एक विद्यालय गार्डको मृत्यु भएको थियो । 

एजेन्सी