आजसम्म सेयर किन्नेले नेपाल टेलिकम र जीवन विकास लघुवित्तको लाभांश पाउने

नेपाल दूरसञ्चार कम्पनी (नेपाल टेलिकम) र जीवन विकास लघुवित्त वित्तीय संस्था लिमिटेडको लाभांश सुरक्षित गर्ने आज चैत १० गते अन्तिम दिन रहेको छ।

लाभांश र वार्षिक साधारणसभा प्रयोजनका लागि नेपाल टेलिकमले चैत ११ गते र जीवन विकास लघुवित्तले चैत १२ गते देखि वार्षिक साधारणसभाको मितिसम्म बुक क्लोज गर्ने निर्णय गरेका छन्। यसको अर्थ आज चैत १० गतेसम्म कायम सेयरधनीहरुले यी दुवै कम्पनीको लाभांश पाउन र सभामा भाग लिन योग्य हुनेछन्।

नेपाल टेलिकमले गत आर्थिक वर्षका लागि कुल ४० प्रतिशत लाभांश वितरण गर्ने घोषणा गरेको छ। जसमा २० प्रतिशत बोनस सेयर र २० प्रतिशत नगद लाभांश (बोनस सेयरमा लाग्ने करसहित) छन्।

नेपाल टेलिकमले पहिलोपटक बोनस सेयर दिने घोषणा गरेको छ। यसअघि कम्पनीले नगद लाभांशमात्रै दिँदै आएको थियो।

प्रस्तावित लाभांश कम्पनीको यही चैत २४ गते काठमाण्डौको टुँडिखेलस्थित त्रिभुवन आर्मी अफिसर्स क्लबमा हुने १४ औँ वार्षिक साधारणसभाले अनुमोदन गरेपछि कार्यान्वयनमा आउनेछ।

सभाले बोनस सेयर जारी पनि कम्पनीको जारी तथा चुक्ताँपुजी १८ अर्ब रुपैयाँ पुर्याउने विशेष प्रस्ताव पनि पारित गर्नेछ।

सभाले गत आर्थिक वर्षको वार्षिक प्रतिवेदन, लेखापरीक्षकको प्रतिवेदनलगायतका महत्वपूर्ण दस्तावेजहरु छलफल गरी अनुमोदन गर्नेछ।

यसैगरी जीवन विकास लघुवित्तको तेस्रो वार्षिक साधारणसभा यही चैत २५ गते आयोजना गर्ने निर्णय गरेको छ। सभा मोरङको कटहरी–२ स्थित संस्थाको केन्द्रीय कार्यालयमा बिहान १०ः३० बजेबाट सुरु हुनेछ।

सभाले गत आर्थिक वर्षको वितरणयोग्य मुनाफाबाट हाल कायम चुक्तापुँजी ६० करोड ८४ लाख रुपैयाँको कुल ७३.६८ प्रतिशत लाभांश वितरण गर्ने विशेष प्रस्ताव पारित गर्नेछ। जसमा ७० प्रतिशतले हुन आउने ४२ करोड ५८ लाख ८० रुपैयाँबराबरको बोनस सेयर र बोनस सेयर कर प्रयोजनार्थ संस्थाले ३.६८ प्रतिशतले हुन आउने २ करोड २४ लाख १४ हजार ७३६.८४ रुपैयाँ नगद लाभांश छन्।

सभाले संस्थाको जारी पुँजी ६० करोड ८४ लाख रुपैयाँबाट वृद्धि गरी १ अर्ब ३ करोड ४२ लाख ८० हजार रुपैयाँ पुर्याउने विशेष प्रस्ताव पनि अनुमोदन गर्नेछ। सभाले सर्वसाधारण सेयरधनीहरुका तर्फबाट प्रतिनिधित्व गर्ने २ जना सञ्चालकको निर्वाचन पनि गर्नेछ।