"अलेभ कबाब सल्टनेट" रेष्टुरेण्ट सामाजिक संजालमा खाना बनाउँदा बनाउँदै सेफ प्रकाशलाई जुरेकाे अवसर

विश्वभर टर्कीको खानाले लगभग अतिक्रमण नै गरिसकेको छ । अझै युरोपियन देशहरुमा टर्कीको दुरुम (टर्किस ह्याप), डोनर केबाप, मिठाईमा बकलाभा, टर्किस डिलाईटले अन्य खानालाई पछि पारिसकेको छ । टर्कीको खानाको स्वाद लिन चाहनेको संख्या विश्वभर नै फैलदा नेपालमा पनि यी खाना खान चाहनेका लागि अलेभ कबाब रेष्टुरेण्ट एक नाम बन्दैछ ।

नक्सालको टंगलवुडमा रहेकाे अलेभ कबाब सल्टनेट रेष्टुरेण्ट साढे २ वर्ष अघि खोलिएको थियो । कैयौं वर्षदेखि नेपाली होटल जगतमा रमाइरहेका तीन जनाले सुरु गरेको अलेभ कबाबमा टर्की र मध्य पूर्वी देशका स्वादिला परिकारहरु पस्किने गरेकाे छ । नेपालको पहिलो टर्किस रेष्टुरेण्ट अलेभ कबाबका सहसंस्थापक प्रकाश विस्तृतमा भन्छन्, "टर्किस खाना धर्म र संस्कृतिसँग जोडिएको हुन्छ । संसारभरको बजारलाई तताइरहेका बेलामा त्यहाँका खाना नेपालमा बेचिरहेका छौँ । नेपालमा नभएको खाना हामीले दिँदा राम्रो प्रतिक्रिया पनि पाइरहेका छौँ ।"

अलेभ कबाब सल्टनेट रेष्टुरेन्टमा खानासँगसँगै खानाकै माध्यमबाट नाटक पनि मन्चन गर्ने गरेको प्रकाशले मेरोलगानीलाई जानकारी दिए । उनी भन्छन्, "तपाईँ टेबलमा बसिसकेपछि खाना सर्भ गर्दा नयाँ कुरा देखाउने कोशिस गर्छौँ । खानाका नयाँ गतिविधि मैले गरेमा तपाईलाई रमाइलो लाग्छ । प्रकाश थप्छन्, "टेबलमा खानाको ठुलो प्लाटर हुन्छ । त्यसमा हामीलो हट सिजलिङ गर्छौँ । त्यो प्लाटरले ४ जनालाई पुग्छ ।"

सुनको जलप लगाएको खाना पनि प्रकाश कटुवालले नेपालमा पहिलो पटक यस रेष्टुरेण्टमा नै पस्किएका थिए । नाइट्रोजनमा पानी राख्दा जुन धुँवा निस्कन्छ,त्यो हेर्दा स्वर्गमा भएको अनुभूति कसलाई नहोला । यस्तो दृश्य देख्दा हर कोहिको मन लोभिन्छ वा मोबाइलमार्फत कैद गर्ने इच्छा जाग्छ ।

तीन किलो नुनको ढिक्का भित्र खाना बनाएको पनि सेफ प्रकाशको अनुभव रहेको छ । नुनमा आगो बाल्ने देखि ६ फिटको केबाप समेत उनले बनाएका छन् । 

रोजगार गुमाएपनि हरेस नखाएका कटुवालले घरमा नै विभिन्न परिकार बनाउन थाले । ती परिकारका तस्बिर तथा भिडियो खिचेर उनले सामाजिक संजालमा राख्ने गर्थे । जसबाट उनलाई अर्डर आउँथ्यो र खाना बिक्री हुन्थ्याे । सामाजिक संजालबाट नै टर्कि तथा मेडिटेरियन खानाका बारेमा ज्ञान भएका कृष्णले प्रकाशसँग नयाँ केहि गर्ने सल्लाह गरे । "मैले हुन्छ भने र रेष्टुरेण्ट खोल्ने तयारी गर्योँ," प्रकाश सम्झिन्छन् । 

१० वर्ष सेफका रुपमा काम गरिसकेका कटुवाललाई रेष्टुरेण्ट खोल्ने इच्छा थियो । "एउटा रेष्टुरेण्ट खोलेर भविष्य सुरक्षित बनाउन मन थियो । समय पनि मिल्यो, योजना बन्यो ।" टर्कीका सेफलाई नेपालमा ल्याएर तालिम समेत गरेका थिए प्रकाशले । 

प्रकाशको नयाँ खाना बनाउने तथा कृष्णको हाेटल क्षेत्रतर्फको लगावले अलेभ कबाब सल्टनेट रेष्टुरेण्टको परिकल्पनालाई साकार बनायो ।