बच्चाको स्वस्थ विकासका लागि अत्यावश्यक पोषकतत्व यस्ता छन्!

धेरै अभिभावकलाई बच्चालाई के खुवाउने तथा हुर्कने समयमा के अत्यावश्यक छ भन्नेमा दुविधा हुने गर्छ । बाल्यावस्था युवा तथा वृद्धावस्थाको आधार हो । सम्पूर्ण उमेर स्वस्थ रहन बाल्यावस्थामा केही पोषकतत्व अपरिहार्य हुन्छन् । बच्चाको सन्तुलित वृद्धि र विकासका लागि अत्यावश्यक ५ पोषकतत्वबारे जानिराखौँ–

१. भिटामिन ए
भिटामिन एले बालकको स्वस्थ विकासलाई सघाउँछ र रोगप्रतिरोधात्मक क्षमता बढाउँछ । बच्चाको खानामा भिटामिन एको सुनिश्चितता गर्न पहेँलो तथा सुन्तला रङका भेजिटेवल्स, जस्तैः जागर, बेलपेपर मिसाउन सक्नुहुन्छ । साथै, दूध, अण्डा र चिजमा पनि भिटामिन ए पाइन्छ ।

२. भिटामिन बी (विभिन्न)
भिटामिन बी२, बी३, बी६ र बी१२ ले शरीरमा मेटाबोलिजम बढाउन शक्तिप्रदान गर्न, नर्भ सिस्टम राम्रो राख्न र समग्र बालविकासमा सघाउँछ । बच्चामा भिटामिन बीको पर्याप्तताका लागि खानामा मासु, माछा, नट्स, अण्डा र दूध नछुटाउनुहोस् ।

३. क्याल्सियम
स्वस्थ हड्डीका लागि क्याल्सियम अपरिहार्य छ । दूधजन्य पदार्थ, जस्तै ः दूध, दही, चिज र हरिया पात भएका भेजिटेबल क्याल्सियमका राम्रा स्रोत हुन् ।

४. आइरन
आइरनले मांसपेशी निर्माणमा सघाउँछ । साथै, रातो रक्तकोषिका स्वस्थ राख्न आइरन आवश्यक हुन्छ । खानामा आइरनको सुनिश्चितता गर्न रातो मासु, बिन, पातवाला तरकारीलगायत मिलाउनुहोस् ।

५. प्रोटिन
बच्चाको हाड, मांसपेशी, छाला तथा रगत निर्माणमा प्रोटिनले सघाउँछ । मासु, बिन र अण्डा प्रोटिनका मुख्य स्रोत हुन् ।